Kryeministri i Shqipërisë, Edi Rama e la të hapur sot zgjerimin e paketës së ndihmës së qeverisë, por kjo nuk do të ndodhë përpara 15 prillit.
Ai tha se ndërmarrjet të cilat kanë vështirësi për të paguar punënjësit, mund të drejtohen për kredi nëpër banka.
“E di mirë që shumë punonjësve po u shkurtohet puna dhe plot sipërmarrës u thonë “s’kam çfarë bëj, ik në shtëpi”. Shumë gjinkalla thonë se duhet të shkojmë përtej garancisë sovrane. Mbase do të na duhet të shkojmë por jo sot dhe jo symbyllur. Së pari do analizojmë gjatë 10 ditëve të ardhshme sjelljen e kompanive në raport me instrumentin që u kemi vënë në dispozicion. Nuk e dimë sa do të zgjasë kjo luftë. E kemi të qartë se edhe një vit po të zgjasë, kategorive që do tu derdhim në llogari paratë gjatë këtyre 10 ditëve do tua derdhin deri në fund të luftës pavarësisht kohëzgjatjes së saj. Përfituesit e mundshëm nga zgjerimi i paketës mbështetëse do ti përcaktojmë jo më parë se 15 prilli sepse do të shohim të dhënat nga fronti i luftës. Deri atëherë sipërmarrjet në pamundësi për të paguar punonjësit do të duhet tu drejtohen bankave për kredi”, tha Rama.
Rama po ashtu shtoi se në takim me bankat kanë marrë garancinë që instrumenti financiar i garancisë sovrane të qeverisë 100 milion dollarë në dispozicion të kompanive për të paguar punonjësit që nuk shkojnë dot në punë do të funksionojë menjëherë.
“Kemi bërë sot një takim me bankat dhe kemi marrë garancinë se instrumenti financiar i garancisë sovrane të qeverisë 100 mln dollarë në dispozicion të kompanive për të paguar punonjësit që nuk shkojnë dot në punë do të funksionojë menjëherë. Edhe shtyrja e kësteve të kredive për tre muaj do bëhet si kemi urdhëruar me Guvernatorin e BSH. E di që ka pasur probleme me bankat ndaj po e theksoj. Duke u lutur për durim dhe besim se ne jemi zgjuar dhe kur ju shkoni të flini pas ditës së gjatë të rezistencës”, u shpreh Rama.
Rama tha se qeveria po punon intensivisht për të siguruar dhe financime nga jashtë vendit.
“Është Lufta e Tretë Botërore dhe kanalet e finacimit përmes bankave të huaja apo institucioneve të tjera financiare nuk janë zgjeruar por janë shumë më të ngushta nga sa ishin para shpërthimit të luftës. Të gjithë po shohin shtëpinë e tyre. Taksiratet e vendeve të mëdha janë edhe më të mëdha se taksiratet tona. Ne jemi mësuar me pak. Do bëjmë si do bëjmë dhe do dalim më të mirë dhe më të fortë në fund. Përtej miliardave që jepen në lajme shumëkujt që është mësuar me me shumë do ti duhet të kënaqet me shumë më pak. Jam opimist se do ti sigurojmë dhe finacimet shtesë për të qenë më pak të shtrënguar edhe në periudhën më pas të zgjerimit të paketës duke u siguruar se kohëzgjatja sado e madhe nuk do të na gjejë të papërgatitur”, tha Rama./OraNews/
