Drejtori i Shëndetësisë, Petrit Loci, që është edhe udhëheqësi i Shtabit Emergjent të Pejës, ka deklaruar se 39 qytetarë nga Sllovenia pritet të kthehen gjatë pasdites dhe mbrëmjes në Kosovë, nëpërmjet pikës kufitare në Kullë.
Loci ka thënë se ka nisur tre ekipe mjekësore të QKMF-së, në këtë pikë kufitare.
Të gjithë do kontrollohen dhe në formë të organizuar do transportohen menjëherë për karantinim në Prishtinë.
“Kemi nisur tre ekipe tona mjekësore. I presim, i trajtojmë, do kontrollohen sipas protokollit dhe të njëjtit do nisen në formë të organizuar për karantinim në Prishtinë.”-tha Loci për ‘RADIO 1’.
Loci po ashtu shtoi se gjatë 24 orëve të fundit, nuk ka pasur asnjë rast të dyshuar nga komuna e Pejës, për çfarë sërish ka lutur qytetarët që të respektojnë masat.
