Sekretari i Jashtëm i Britanisë së Madhe ka njoftuar se 439 njerëz vdiqën në 24 orët e fundit nga coronavirusi, duke rritur numrin e përgjithshëm të vdekjeve nga sëmundja në mbi 5,000.
Sipas medieve të huaja, përcjell Telegrafi, Dominic Raab dha përditësimin e qeverisë së Mbretërisë së Bashkuar së bashku me zyrtarët shëndetësorë, pasi kryeministri Boris Johnson mbetet i shtruar në spital me simptomat e COVID-19.
I pyetur se pse Kryeministri po vazhdon të jetë në krye të detyrës edhe pse është i sëmurë dhe i shtruar në spital, Raab tha se është në spital si një masë paraprake për shkak të simptomave që vazhdojnë.
Ndryshe, Johnson kishte bërë një postim nga spitali për të thënë se ai është “me disponim të mirë”, pasi kaloi një natë të parë atje për t’iu nënshtruar testeve pasi u diagnostikua me coronavirus 11 ditë më parë.
Kryeministri konservator i përshkroi testet si “rutinë”, por shtoi se ai “ende po përjetonte simptoma të coronavirusit”.
Më shumë se 47,000 njerëz në Mbretërinë e Bashkuar kanë dalë pozitivë në testet për COVID-19 dhe rreth 5,000 njerëz kanë vdekur deri më tani.
Në një fjalim të rrallë para publikut britanik të dielën, Mbretëresha njohu sfidën e shpërthimit të pandemisë së coronavirusit dhe u bëri thirrje njerëzve të qëndrojnë të fortë.
